"İdman menecmenti" ixtisaslaşmasının tələbələri Böyük Britaniyada səfərdədir
Magistratura təhsil səviyyəsinin tədrisi ingilis dilində aparılan "İdman menecmenti" ixtisaslaşmasının II tədris ili tələbələri təlim-tədris məqsədilə Böyük Britaniyada səfərdədir. Səfər zamanı müxtəlif idman müəssisələrinə ziyarətləri nəzərdə tutulan tələbələr “Tottenham Hotspur” klubunun ev oyunlarını keçirdiyi eyniadlı stadionda olublar.
Tələbələrə idman qurğusunun tikilməsi və tarixi haqqında məlumat verilib və bu mövzu ilə bağlı qısa videoçarx nümayiş etdirilib.
Daha sonra tələbələr xüsusi təlimatlandırıcı qurğudan istifadə etməklə stadion ərazisini gəzib, müxtəlif təyinatlı idman otaqları, konfrans zalı, tibb otağı, trenajor zalı və digər bölmələrlə tanış olublar.
Magistrantlar həmçinin müasir avadanlıqlarla təchiz olmuş stadionun ot örtüyünün qorunması, səs akustikasının tənzimlənməsi ilə əlaqədar görülən işlərlə bağlı məlumat əldə edərək stadion mütəxəssislərindən onları maraqlandıran suallara cavab alıblar.
