ASAPES nümayəndələri VII Mərkəzi Asiya Beynəlxalq Forumunda
Azərbaycan Dövlət Bədən Tərbiyəsi və İdman Akademiyasının nümayəndə heyəti Müstəqil Akkreditasiya və Reytinq Agentliyinin (IAAR) dəvəti əsasında 6-7 oktyabr 2023-cü il tarixlərində “Təhsil üçün Davamlı Gələcək – Keyfiyyət və Rəqabətlilik: Tarixi Perspektiv, Reallıqlar və Prioritetlər” mövzusunda Qazaxıstan Respublikasının Astana şəhərində Təhsilin Keyfiyyətinin Təminatı üzrə VII Mərkəzi Asiya Beynəlxalq Forumunda iştirak ediblər. Forumda Akademiyanı İnformasiya texnologiyaları və tədrisdə innovasiyalar departamentinin direktoru Şaiq Məmmədli, İdman menecmenti və kommunikasiya kafedrasının müdiri Nailə Kələntərli, Sosial elmlər kafedrasının müdiri Lalə Əhmədova və İnsan resursları və hüquq şöbəsinin müdiri Fatma Məmmədova təmsil edib.
Forumun məqsədi təhsildə daxili və xarici keyfiyyət təminatı sisteminin inkişafı, təhsil sahəsində beynəlxalq təşkilatlar ilə əməkdaşlığın genişləndirilməsi, keyfiyyət mədəniyyətinin təşviqi, akademik ictimaiyyətin və beynəlxalq əmək bazarının konstruktiv qarşılıqlı fəaliyyətinin aktual məsələlərinin müzakirəsi olub.
Forumda dövlət qurumlarının nümayəndələri, beynəlxalq ali təhsil keyfiyyətinin təminatı şəbəkələri, Qazaxıstan, Belçika, Hindistan, Malayziya, Türkiyə, Azərbaycan, Qırğızıstan, Özbəkistan, Tacikistan, Moldova və s. kimi ölkələrin ali təhsil müəssisələrinin rəhbərləri iştirak ediblər.
Forumda təhsil sisteminin inkişafında qlobal çağırışlar və trendlər, elmi və təhsil modellərinin hazırlanması və rəqəmsal transformasiya kontekstində texnologiyalar məsələləri müzakirə edilib.
Akademiya nümayəndələri Avropa Keyfiyyət Təminatı Agentliyinin (EQAR) prezidenti Stefan Lovik, Ali Təhsil üzrə Keyfiyyət Təminatı Agentlikləri Beynəlxalq Şəbəkəsinin direktoru, Beynəlxalq Məsləhət Şurasının üzvü (CHEA, ABŞ), İslam Dünyası Keyfiyyət Təminat Agentlikləri Assosiasiyasının vitse-prezidenti Olğun Çiçek ilə görüşlər keçirib, aktual mövzular ətrafında müzakirələr aparıblar.
